June 22, 2022
腸道江湖 PART 1
每個人體內都有屬於自己嘅小世界，喺呢個世界裡面大腦就好似江湖大佬統領指揮，底下有細菌﹑真菌不同門派，大家互相配合成就人類身體健康嘅關鍵。只不過江湖中門派眾多，發生衝突在所難免。以腸道江湖為例，當中有三大勢力分別係維護人類身體健康嘅有益菌﹑時而安分時而鬧騰嘅中性菌﹑及對人類不懷好意嘅有害菌。而小編今日就想同大家講下「雙歧桿菌」，一個隸屬於有益菌門派下嘅小劍俠。
喺有益菌門派下雙歧桿菌嘅成員佔比例高達95%，同時仲係腸道嘅常備部隊，勢力最大! 正常情況下，初生嬰兒喺分娩過程中與媽媽產道接觸，雙歧桿菌會經由嬰兒嘅口腔或肛門等通道輸送到腸道江湖中。再加上初生嬰兒一直有食母乳，而母乳有促進雙歧桿菌﹑抑制大腸桿菌及其他病菌生長嘅作用，所以順產出世嘅嬰兒腸道內雙歧桿菌不斷繁殖，贏在起跑線上!
但對於剖腹產或進食配方奶粉嘅新生兒，少咗接觸有益菌嘅渠道令佢哋迎來好大危機! 由於腸道功能尚未發育成熟以及有害菌侵襲，嬰兒好容易出現腸道不適﹑抵抗力下降等情況，嚴重嘅甚至會有壞死性小腸結腸炎。而有益菌想收復失地的話，一定要請求外援幫手! 通過補充益生菌為腸道帶嚟乳雙歧桿菌﹑短雙歧桿菌和鼠李糖乳桿菌等外援，幫助增強實力，提升免疫系統。